Күптән түгел генә Татарстан китап нәшрияты “Геройлар янәшәдә” исемле бик тә үзенчәлекле китап бастырып чыгарды. Бу затлы җыентыкта исә быел Татарстан Республикасы Рәисе каршындагы Татар телен саклау һәм үстерү мәсьәләләре комиссиясе белән берлектә, “Татмедиа” агентлыгы тарафыннан СВОда катнашучылар турындагы әдәби әсәрләргә игьлан ителгән конкурста повесть номинациясе буенча җиңүчеләрнең иҗат җимешләре тупланган. Анда Нурлат шәһәрендә яшәүче язучы Илдус Гали улы Диндаровның әлеге бәйгедә икенче урынны яулаган “Хәрби исеме – Такташ” дигән повесты да бар. Автор аны Махсус хәрби операциягә үз теләге белән киткән улы, тарих фәннәре кандидаты Айваз Диндаровка багышлаган.