Татарстан Республикасы Язучылар берлеге

 

 

Сәләхов Булат

Булат Нуретдин улы Сәлахов 1952 елның 21  мартында Арча районы Алан авылында туа. Алан башлангыч мәк­тәбен, Югары Курса (Г. Курсави мәчетендә урнашкан) си­гезьеллык мәктәбен тә­мам­лый. 1968–1970 елларда Кукмарада 39 нчы һөнәр училищесында белем ала. Казан киез итек фабрикасында эшли. 1972–1974 елларда Байконурда Совет Армиясе саф­ларын­да хезмәт итә. 1974 елда комсомол юлламасы белән «КамАЗ»га килә һәм 1988 елга кадәр Шәһәр төзү идарәсендә эретеп ябыштыручы булып эшли. Шул ук вакытта, талантлы режиссёр Илдар Ха­җиев җитәкләгән татар халык театрында ак­тив катнашып, төрле образлар иҗат итә. Кичке мәктәптә урта белем ала. Казан дәүләт мәдәният һәм сәнгать академиясендә режиссёр һәм актёр һөнәрен үзләштерә.

Булат Сәлахов – Чаллы татар дәүләт драма теат­рына нигез салучыларның берсе. Шунда эшләп 1976 елдан бү­генге көнгә кадәр җитмештән артык роль иҗат итә һәм уннан артык спектакльне сәхнәгә куя.

Булат Сәлахов драма әсәрләре язу белән дә уңышлы шөгыльләнә.

2012 елдан – Татарстан Республикасы Язучылар берлеге әгъзасы.

2012 елдан сәхнә әсәрләре өчен бирелә торган Дамир Сираҗиев исемендәге премия, 2014 елда «Тан­тана» театраль премиясе лауреаты була.

Яр Чаллы татар дәүләт драма театры сәхнә­­­сендә Бу­лат Сәлаховның «Эшләр тәтәй, иптәш­ләр» (1992), «Җә­милә авылы» (1998) комедияләре, Коми
драматургы Камай Өләш пьесасы буенча эшлән­гән «Көнләшәм, яратам» комедиясе (2001) та­ма­шачы­лар мәхәббәтен яулады. Башкорт дра­ма­тургы Са­лават Әбүзәров пьесасы буенча куел­ган «Хыялый» (2012) лирик комедиясе, ав­тор үзе язган һәм баш рольне үзе башкара тор­ган «Яр» драматик новелласы (2002) әле дә сәх­нәдә зур уңыш белән бара. Яр Чаллы татар дәүләт драма театры бу әсәр белән 2016 елда үткән «Кәрим Тинчурин исемендәге халыкара театраль фестивальдә» катнашып, югары дә­рә­җәдәге диплом бе­лән бүләкләнде.

Булат Сәлаховның Минзәлә татар дәүләт драма театрын­да «Адашкан җан» драмасы (2002), Буа татар дәүләт са­тира театрында «Көтү» (2013) ко­ме­дия­се зур уңыш казанды. «Көтү» комедиясе «Яңа татар пьесасы – 2012» дә кызыксындыру пре­мия­сенә лаек булды. «Яра­тылмый калган ярлар» балладасы «Яңа татар пьесасы – 2014»тә Татарстан Республикасы Мә­дә­ният министрлыгының мах­сус премиясе белән бүләкләнде.

Булат Сәлахов 1990–2000 елларда җырчы Салават Фәтхетдиновның «Салават» җыр театрында меңнән артык концертны алып баручы һәм режиссёр буларак үзен эстрада жанрында да күрсәтте.

Ул шулай ук илледән артык юмористик хикәя­ авторы да.

2000 елдан – Татарстан Республикасының атказанган артисты.

2009 елдан – Татарстан Республикасының халык артисты.

 

 

Язучылар