Дания Нәгыйм (Дания Нурулла кызы Галәветдинова) 1991 елның 7 маенда Балык Бистәсе районы Югары Тегермәнлек авылында дөньяга килә. Үз авылында гомуми урта мәктәпне тәмамлый һәм 2009-2011 елларда Казан сәүдә-икътисад техникумында икътисад бүлегендә белем ала. Аннары Казан кооперация институтында укый.
Дания беренче шигырьләрен 2 сыйныфта укыганда ук яза. Шулай ук кечкенәдән мәкаләләрен район һәм республика газеталарында дөнья күрә. Мәкалә, шигырь, хикәя, әкиятләре һәм балалар өчен шигырьләре төрле басмаларда: “Авыл офыклары”, “Сабантуй”, “Идел”, “Мәйдан”, “Мәдәни җомга”, “Шәһри Казан”, “Казан утлары”, “Сөембикә”, “Ирек мәйданы”, “Көмеш кыңгырау”, “Салават күпере”, “Татар дөньясы” газета һәм журналларында басыла. Иҗатына иң беренчеләрдән булып игътибар итүче һәм хәер-фатыйхасын бирүче шагыйрьләр Вазыйх Фатыйхов, Зиннур Мансуров һәм Рәдиф Гаташ була. Мәктәптә укыганда, Дания олимпиадаларда актив катнаша. Татар һәм рус телләре буенча район күләмендә беренче урыннарны яулый.
Д.Нәгыймнең шигырьләре яшь язучыларның “Иделем акчарлагы” (2011) конкурсында Гран-прига, “Сәләт”кә нур булган йолдызлар” (2014) һәм “Таян Аллага” (2020) бәйгеләрендә 1 урынга лаек була. Шулай ук Идел-Урал төбәге студентларының “Шигъри Сабантуй” (2013) конкурсында “Сабантуй батыры” исемен дә яулый. Кайбер шигырьләре, рус һәм азәрбайҗан телләренә тәрҗемә ителеп, антологияләргә кертелә. Дания Нәгыйм 2021 елдан Татарстан язучылар берлеге әгъзасы.
Шагыйрәнең ике китабы дөнья күрде: “Галәм агачының яфрагы мин” (2015 ел) исемле шигырьләре җыентыгы һәм, Омск шәһәрендә казарма җимерелеп, хәрабәләр астында калып аякларын югалткан, шуңа да карамастан, бик күп уңышларга ирешкән Рөстәм Нәбиев турында “Бөртекләп җыелган гомер” (2018 ел). Беренчесенә кереш сүзне Татарстанның халык язучысы Ркаил Зәйдулла язган.
Дания ире Илназ белән ике ул тәрбияли. “Идел” яшьләр үзәгендә яшьләр эшләре буенча белгеч, аннан соң “Шәһри Казан” газетасында журналист булып эшли. Бүгенге көндә “Татарстан” радиосында тапшырулар алып бара. Казанда яши.