Лилия Фәрхетдинова ( Фәрхетдинова Лилия Нәсыйх кызы-Фархутдинова Лилия Насиховна) 1971 нче елның 4енче августында Татарстан республикасының Әлмәт каласында туа. Туган шәһәрендә 2 нче урта мәктәпне, аннары Бөгелмә педагогия училищесын,Алабуга дәүләт педагогия институтының татар филология факультетын тәмамлый. Бүгенге көндә Әлмәт шәһәрендә мәктәптә уку-укыту эшләре буенча директор урынбасары булып эшли. Ул “Россия Федерациясенең иң яхшы укытучылары” Россиякүләм конкурс җиңүчесе һәм Президент Грантына ия (2006), Татарстан укытучылары арасында узган “Безнең иң яхшы укытучыбыз” конкурс җиңүчесе(2011),Татарстан мәгариф һәм фән министрлыгы Мактау грамотасы(2015) һәм “Мәгарифтәге казанышлары өчен” күкрәк билгесе белән бүләкләнгән(2018).
Л.Фәрхетдинова иҗатка мәктәптә укыган чагыннан ук тартыла. Башта Әлмәт районында дөнья күргән газеталарда, аннары республика һәм Россия матбугатында ( “ Идел”, “Сөембикә”,”Сабантуй”, “Ялкын”,”Салават күпере”,”Күчтәнәч”,”Татарстан яшьләре”, “Мәгърифәт”,”Ачык дәрес”,”Көмеш кыңгырау”, “Тылсымлы куллар”, “Чаян”, “Мәйдан”, “Учительская газета”, “Добрая дорога детства” һ.б.) хикәяләре, мәзәкләре, мавыктыргыч әкиятләре ,мәкаләләре басыла. Әкиятләре “ТНВ-Татарстан” һәм “ТНВ-Планета” телеканалларында баручы “Күчтәнәч” тапшыруларында даими тапшырыла,ГТРК “Татарстан радиосы”нда “Язучылар-балаларга” тапшыруында яңгырый.
Лилия Фәрхетдинова иҗаты аша укучыларын авырлыкларга бирешмәскә өйрәтә , балаларны китап укырга өнди.
Лилия Фәрхетдинова китаплары:
1. «Илһам чишмәләре / Татарстан язучылар берлегенең Әлмәт бүлеге оешуга 50ел.-Родники вдохновения / Альметьевскому отделению Союза писателей РТ 50 лет.», «Рухият»,2013год.
2. «Барабанчы Куян»-Казан: Татарстан китап нәшрияты, 2015.
3. «Тылсымлы бүрек»-Казан: «Ихлас» нәшрияты, 2015.
4. «Әкиятләр»-Казан: «Илһам» нәшрияты, 2016.
5. «Дуслык »-Казан: «Ихлас» нәшрияты, 2017.
6. “Җылы сүз. Доброе слово. A kind word” –Казан: Татарстан китап нәшрияты, 2018.
7. “Өч алма”-Казан: “Рухият”, 2019.
Лилия Фәрхетдинова -Татарстан Язучылар берлеге әгъзасы (2018елдан), Рафаил Төхфәтуллин исемендәге премия лауреаты(2019),”Туган яктан илһам алып”әдәби конкурс призёры(2урын,2019ел).
Татарстан язучылар берлгегенең рәхмәт хаты белән бүләкләнгән(2019)
