19 февральдә Багратионовск шәһәренең хәрби мемориалында татар шагыйре Фатих Кәрим җирләнгән урында фронтовик шагыйрьне искә алу чарасы булды.
Татарстан Премьер-министры урынбасары, Бөтендөнья татар конгрессының Милли шура рәисе Васил Шәйхразыев җитәкчелегендәге Татарстан делегациясе шагыйрь һәйкәленә чәчәкләр салды.
Делегация составында шагыйрьнең кызы Ләйлә Кәримова да бар иде. Хәрби мемориалга керү юлында шәһәр кунакларын балалар һәм шәһәр округы администрациясе башлыгы Максим Азов каршы алды. Тантаналы митинг аның сәламләү сүзе белән башланып китте.
«Без Бөек җиңүнең безгә ничек авыр бирелгәнен беләбез. Күпме төзелми калган һәм җимерелгән гаиләләр, күпме югалтулар. 19 февраль безнең өчен истәлекле дата. Нәкъ менә бүген, бөек шагыйрь Фатих Кәримнең йөрәге тибүдән туктады. Без, биредә аңа карата булган шушы хөрмәт өчен, чын күңелдән шатланабыз», — диде Милли шура рәисе Васил Шәйхразыев һәм администрация башлыгына рәхмәт әйтте.
Татарстан кунаклары шәһәр округы башлыгы белән бергә Багратионовск Төбәк тарихы музеен, Фатих Кәримгә багышланган экспозицияне карады. Максим Азов Васил Шәйхразыевка Багратионовск балалары өчен Фатих Кәримгә багышланган конкурс оештырырга һәм җиңүчеләрне шагыйрьнең туган ягына алып барырга тәкъдим итте.
Яңа комментарий өстәргә