Татарстан язучылар берлегендә «Язучы» нәшрияты эшли башлады

Китап Татарстан Хөкүмәте ярдәме белән басылып чыгачак.

«Алга таба яшь язучыларның юка гына китапларын чыгарырбыз дип уйлыйбыз. Айга шундый бер китап итеп елга 12 китап чыгармакчы булабыз», дип планнары белән бүлеште Язучылар берлеге рәисе.

«Безгә «Татмедиа» да бу инициатива белән чыккан иде. Яшьләр өчен осталык дәресләре, районнарда әдәби берләшмәләрне җанландыру, булмаганнарын төзү планнары бар. Мәктәпләрдә очрашулар ясап, әдәби иҗат белән шөгыльләнүчеләрне туплап лаеклыларның китапларын чыгару идеясе», диде Ркаил Зәйдулла.

Әлеге «Яңа заман әдәбияты» проекты Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе белән берлектә тормышка ашырылачак.

Татарстан Язучылар берлеге нәшрият эшен тормышка ашыру өчен өстәмә штатлар булдыру мәсьәләсен күтәрми. Китаплар әзерләү өчен Берлек аппараты үз көче һәм читтән белгечләр җәлеп итеп башкарачак.