Әлмәт шәһәренең 2нче китапханәсендә прозаик һәм публицист Әсгать Сәхап улы Салаховның юбилее уңаеннан медицина көллияте студентлары һәм 7 мәктәп укучылары белән очрашу булды. Язучының туган авылы Елховойдан килгән кунакларның да чарада катнашуы, якташларына олы хөрмәт билгесе ул. Әсгать Салахов 1935 елның 5 гыйнварында Татарстанның хәзерге Әлмәт районы Елховой авылында туган. Ә. Салах — Татарстан Республикасының атказанган мәдәният хезмәткәре, Р.Төхфәтуллин исемендәге әдәби премия лауреаты. Газетада бер-бер артлы хикәяләре, очерклары, хатирәләре басылып тора. «Балыкчы малайлар», «Соңгы вальс», «Каеннар юлы», «Көт син мине…» китаплары, “Бараҗ токымы” биографик җыентыгы авторы. 2001 елдан Татарстан Язучылар берлеге әгъзасы.