16 февральдә Әлмәттә татар халкының бөек улы, каһарман шагыйрь Муса Җәлилнең тууына 120 ел тулуга багышланган шигъри чара үтте.
Искә алу митингына Әлмәт муниципаль районы башкарма комитеты җитәкчесе Айдар Каюмов, язучылар, укытучылар, китапханәчеләр, драма театры артистлары, ветераннар, мәктәп укучылары һәм шагыйрьнең иҗатын яратучылар килгән иде.
Бәйрәмнең тантаналы өлешен Айдар Каюмов ачты. «Муса Җәлилнең иҗаты Ватанга чиксез мәхәббәт белән сугарылган, бу аның һәр сүзендә, һәр шигырендә күренә. Аның тормышы — безнең барыбыз өчен дә үрнәк, туган җиргә карата тугрылык үрнәге. Мин, үсеп килүче буын ярдәмендә, Муса Җәлилнең исеме гасырлар аша, киләсе буыннарга да тапшырыласына ышанам», — диде ул.
Тантананың әһәмиятен Бөтендөнья татар конгрессының Әлмәт бүлеге җитәкчесе Ландыш Зарипова да билгеләп үтте: «Бу тантана халкыбызның герой-шагыйренә булган хөрмәтен, тирән ихтирам хисләрен һәм рәхмәтен тагын бер тапкыр раслый…Муса Җәлил һәм аның кебек батырларыбыз рухында тәрбияләнгән ир-егетләребез бүгенге көндә илебез тынычлыгы, азатлыгы өчен көрәшәләр, хезмәт итәләр», — диде ул.
Татарстан Язучылар берлегенең Әлмәт бүлеге җитәкчесе Равил Сабыр үз чыгышында яшь буында Җәлилчә ватанпәрвәрлек, ирек-хөррият сөю хисе тәрбияләү — мөһим бурыч икәнен турында басым ясап сөйләде.
Аннары бөек шагыйрьнең һәм аның көрәштәшләренең якты истәлегенә бер минут тынлык игълан ителде һәм һәйкәленә чәчәкләр салынды.
Чара дәвамында Әлмәт татар драма театры артистлары Муса Җәлилнең шигырьләрен сөйләделәр, аның тормыш юлын һәм иҗатын искә төшерделәр. Моннан тыш «Ачык микрофон» оештырылды — шәһәр мәктәпләре укучылары Җәлил шигырьләрен укыдылар.
Йомгаклау өлешендә нефть башкаласы язучылары Зинаида Захарова, Миңзифа Әхмәтшина, Гүзәлия Галләмова, Резеда Хәертдинова, Людмила Аланлы, Шамил Ханов каһарманлык, туган якка мәхәббәт турында шигырьләр укыдылар.
Тантаналы чара «Ассоль» кафесында чәй табыны артында дәвам итте. Язучылар мәктәп укучыларын иҗатлары белән таныштырдылар. Балалар, үз чиратында, аларны шигырьләр, җырлар һәм биюләр белән сөендерделәр.
Яңа комментарий өстәргә